Psa 145 | PONPDN | STEP | I PAN kapinga komui, ai Kot o Nanmarki, o kapinga mar omui ansau karos kokolata.

Psalms 145

1 I PAN kapinga komui, ai Kot o Nanmarki, o kapinga mar omui ansau karos kokolata.
2 I pan kapinga komui ni ran akan karos, o kapinga mar omui ansau kan karos kokolata.
3 Ieowa meid lapalap, o kapinga pan, o sota me kak dedeki duen a lapalap.
4 Seri en seri kan pan kapinga omui dodok kan, o kasokasoi duen omui manaman.
5 I pan kasokasoia duen lingan en omui kapwat, o i pan kaulki duen omui manaman akan.
6 O re pan kasokasoia duen manaman en omui dodok kan, o pan kapakaparok duen omui lapalap.
7 Irail pan kasokasoia duen omui kalangan lapalap, o pere peren o kapinga duen omui pung.
8 Ieowa me dir en mak o kapunglol, kanongama o limpok.
9 Ieowa me kalangan ong karos o a kapunglol ong a wiawia kau karos.
10 Sapwilim omui wiawia kan en kapinga komui. Maing Ieowa, o sapwilim omui lelapok kan en kapinga komui.
11 O ren kasokasoia duen lingan en wei omui, o ren kapaka parokki duen omui manaman.
12 Pwe aramas akan en dedeki duen omui manaman o lingan ong wei omui.
13 Wei omui wei soutuk eu, o omui kakaun pan duedueta kokolata.
14 Ieowa kin kotin kolekol karos, me pan pupedi, o kainseu maula karos, me mamauk.
15 Por en mas karos kasikasik komui, o kom kotiki ong ir kan ar kisin manga ni ar ansau.
16 Kom kotiki pasang Lim omui o kadirela karos, me memaur, duen kupur omui.
17 Ieowa me pung ni al karos o saraui ni a wiawia kan karos.
18 Ieowa kotikot ren karos, me likwir ong i, karos, me likwir melel.
19 A kotin wiai ong, me masak i duen ar inong. A kotin mangi ar ngidingid, ap kotin sauasa ir.
20 Ieowa kin kotin sinsila karos, me pok ong i, a pan kamela me doo sang Kot akan karos.
21 Au ai pan kapinga Ieowa, o uduk karos kapinga mar a saraui ansau kan karos kokolata.